無論男女，當面對脫髮嘅問題，真係想好似琴姐同蝦叔咁大叫世界末日呀！慘無人道呀！大人都咁難受更何況係少女？喺美國有一位少女Gabby就唔好彩患咗俗稱「鬼剃頭」嘅皮膚病，好彩佢有個好巴打Tyler仔，一個甘去為佢留長頭髮的人。

Tyler仔今年十歲，同普通男仔冇咩分別，但係佢就留住好少同年紀男仔肯留嘅長頭髮。唔係因為佢鍾意某個rocker，而係因為佢好想幫自己嘅好朋友。佢知Gabby其實試過接受治療，但係情況都冇改善，所以決定兩年唔剪頭髮，幫Gabby整一個專屬嘅假髮。

雖然而家社會開明咗好多，但係男仔留長頭髮唔多唔少都會畀人認錯係女仔，甚至有啲嘴賤嘅人會笑佢?。不過Tyler仔冇因為咁而放棄，繼續遵守諾言，終於喺啱啱過去嘅12月尾完成任務，仲係由Gabby親自幫佢剪走條馬尾，跟住就拎把頭髮去有關機構加工喇～

你睇剪咗頭髮嘅Tyler仔幾有型？佢嘅有型唔止因為剪咗個靚頭，更重要係佢嗰份有承擔、有腰骨嘅男人氣魄呀！Tyler仔年紀細細就咁識為女仔著想，肯肯定係優質潛力股啫～

封面圖片及資料來源： ABC News