細細個有冇睇過《小飛象》呀？象仔啱啱出世嗰陣，就係因為對耳仔太大而畀人笑囉。象仔咁可愛都畀人笑，更何況小朋友呢，所以唔少父母見到BB天生有兜風耳，驚佢第日畀人笑似馬騮仔，都會趁佢仲細，對耳仔未定型，幫佢哋用膠紙黐一黐對耳仔，同埋瞓覺嘅時候幫BB打側個頭壓一壓對耳仔㗎～

呢隻打側瞓嘅喵星人，唔通都有兜風耳？咦唔係喎，貓貓對耳仔生喺頭頂㗎嘛，關咩事啫。咁睇嚟佢純粹係睡相比較差啫……聖上最憎就係畀人打擾佢瞓晏覺嘅雅興㗎喇，我哋都係放輕腳步步，小心啲行埋去佢身邊啦，唔好嘈醒佢吖嘛～

哎呀，奴才咁靜都嘈醒咗主子?！聖上，奴才都係想行埋嚟睇下你個位有冇對正風口，驚你冷親咋，真係冇心阻住你發好夢㗎唔好嬲我呀……Btw，聖上你塊面……冇嘢下話？

估唔到聖上只係打側瞓咗陣，就已經喺夢入面成功整容喇，連刀都唔使開！（擦鞋mode）主子好嘢！主子萬歲！不過，點解主子個樣仲係嬲爆爆咁嘅？唔通佢鍾意自己肥嘟嘟圓碌碌個樣多啲？

主子表示：收聲啦蠢奴才，你咁嘈朕點瞓多陣，壓扁埋另一邊面呀！

封面圖片、資料來源連結：你扯到我腿毛了／微博

睇埋：【世界末日喇】個死人貓奴剪到本主子咁樣樣…