公仔唔止係玩具，仲係陪伴我哋成長嘅好朋友，去旅行又點可以自私玩，唔帶埋佢哋一齊出國見識下㗎！不過帶公仔去旅行就真係好似帶住矛盾去旅行咁，一方面又想幫佢哋影靚相，但另一方面又驚唔小心整唔見，會同佢哋天各一方啵！

話口未完，就有個大頭蝦嘅小妹妹漏低咗隻熊仔喺機場喇！話說小妹妹同屋企人由俄羅斯出發去泰國玩嘅時候，唔小心同熊仔走失咗，佢梗係傷心到喊咁口啦，於是媽咪就寫email請機場嘅哥哥姐姐幫手照顧一下熊仔，等回程嗰時再接熊仔返屋企～

可能熊仔對於同小主人失散咗都感到好不安呀，不過熊以食為天，冇三文魚食，食返件甜品都可以安慰下弱小心靈嘅～

唔好以為熊仔自己一個留喺機場就好慘慘豬呀，其實佢都不知幾爽皮，機場哥哥姐姐帶佢任玩玩具之餘，仲幫佢影咗好多靚相呀！熊仔表示：平時畀人玩就試得多，原來玩玩具係咁開心㗎，真係好爽歪歪呀！主人呀，下次你出門都係擺我喺機場得㗎喇，我唔會掛住你……吖唔係，唔使咁掛住我㗎！

主人有主人喺泰國玩，熊仔都有熊仔喺機場做VIP，玩到攰仲有張大床畀佢一個熊瞓晒，唔使同其他公仔迫?！喺機場玩得咁開心，會唔會小主人唔見佢嗰時就主人喊，到接返佢走嗰時就輪到熊仔喊㗎？

封面圖片、資料來源連結：The Siberian Times 

延伸閱讀：【五星級服務】服侍埋你漏低隻公仔又點話？