而家啲樓價越嚟越高，如果唔靠父幹，都真係幾難上車㗎。所以，有一個好爸爸，你就已經贏在起跑線喇～不過就算買唔起樓都可以係好老竇嚟嘅，好似呢個台灣呢個阿爸咁，買唔起，咪自己砌間屋畀個女做嫁妝囉！

嘩！係獨立屋呀～當其他人供得咁辛苦先有間劏房豪宅嘅時候，妹妹細細個就自己獨佔一間屋，你叫一眾廢青點面對呢？呢間屋仲要用咗最先進同環保嘅建築材料再加上高質防水物料，格隔實用，即日就可以入伙，你睇妹妹咁開心就知佢滿意啦！

咦，老竇，你好似偷工減料喎，妹妹瞓喺度對腳仔出晒嚟喇！不過妹妹瞓得咁開心舉晒V字咁，就算唔夠大都冇咩所謂啦，都係爸爸嘅一份心意呀嘛～妹妹第時想養狗仔嘅時候，仲可以讓畀狗狗住?～

要氹囝囝囡囡，唔一定要識起樓嘅，識整船仔都得㗎～有另一個爸爸就用發泡膠同保鮮紙整咗架船仔同水上玩具畀囝囝玩，仲要係真係可以載人㗎！出航啦，未來嘅海賊王！

其實要帶畀小朋友一個開心嘅童年，笨唔一定講緊買幾多豐富嘅物質，有時由爸爸媽媽為佢哋親手整嘅玩具，對佢哋嚟講已經係最大嘅寶藏喇。而有父母同佢哋一齊玩嘅時間，已經係最好嘅回憶啦～你話係唔係呀，哈姆太郎？

封面圖片及資料來源： Helios Chen／爆廢公社、許郁菁／爆廢公社