汪星人一見到主人返屋企就會瘋狂揈尾揈到好似就嚟甩咁，喵星人心情好嘅時候都會用個身磨下奴才留低啲氣味，但係養魚星人嘅朋友又冇得摸下佢哋個頭，又冇得帶佢哋散步，見到魚星人一日到黑都淨係游嚟游去，所以好多時都以為佢哋冇感情㗎。

少年，你太年輕喇！中化科都講過啦，萬物皆有情吖嘛，魚仔都唔例外嘅！最近就有個日本網民發現佢屋企個魚缸上演咗一幕令人好滾動嘅故事喇。是咁的，佢養咗兩條金魚，其中黑色嗰條就有殘疾問題，唔係好游到水，所以成日都沉喺魚缸底嘅。

之不過魚糧就永遠都浮喺水面嘅，咁小黑食幾啖又沉食幾啖又沉，點算好呀？唔通真係喜歡你讓我下沉咩～有一日，主人發現阿金竟然用自己身體托住有殘疾嘅小黑上水面食魚糧呀！

阿金呢個動作唔係偶然㗎，佢托托下見到小黑又開始沉落去，佢就再努力游過去托返小黑上去，睇嚟係真心想幫小黑嘅。我哋成日以為魚類冇感情，但估唔到佢哋一樣有手足之情！

魚生有個真正朋友的確好極呀！不過聽人講金魚得7秒記憶，希望小黑唔會食飽之後轉個頭就唔記得阿金呢個好同伴點樣幫過自己啦！

封面圖片、資料來源連結：rocketnews24、Kometto Channel／YouTube

延伸閱讀：【超勵志】金魚仔本來係娃娃魚飼料 三年嚟食脫皮努力生存