聖誕節交換禮物已經以為夠伏？如果你喺聖誕嗰陣換到啲杯呀、毛巾呀之類嘅嘢，都唔使咁灰嘅，起碼可以自己用，或者留返下年再拎返出嚟再抽過，將幸運pass畀下一位朋友呀嘛～呢位朋友仔仲sad呀，以為過咗聖誕先交換禮物，最多都係抽到啲揮春同利是封啫，點知抽到啲仲伏嘅應節禮物呀！

話晒嚟緊係雞年，所以周街都開始賣啲有雞仔圖案嘅嘢，真係忍唔住想唱返句「雞全部都係雞～」呀。不過估唔到，有人竟然應節到用一隻生勾勾嘅公雞嚟交換禮物呀！大佬，你買隻母雞我都叫做日日有蛋食呀，你買隻公雞畀我唔通真係當鬧鐘用咩！

呢個台灣嘅朋友仔除咗幫隻公雞影相擺上網呃下like，都唔知可以拎隻雞去做咩，煮咗佢又唔忍心，養佢又會朝朝六點就叫你起身。唉，唔好話你呀，你睇下雞大哥個樣幾不爽，完全就係問緊「你幾時畀個名份我」嘅樣呀！ 好彩最後有個好心嘅老師肯收養隻公雞，唔係真係搵隻雞陪你過雞年喇～

其實呢份禮物都幾好呀，養著一隻好似呢隻咁有靈性嘅提款雞，分分鐘可以過個肥雞年?呀～Any肥，溫提大家一句，咁樣交換禮物，係好笑嘅，不過就真係得啖笑囉～養寵物喺一生一世嘅承諾，千祈唔好亂送動物畀Fd子呀！

封面圖片及資料來源：dcard