每次食雞嘅時候，?到成枱都係骨，都覺得自己好嘥呀，如果連骨都可以食埋，隻雞咪抵食一倍囉！之前見過有日本妹豬食完白頭佬炸雞，拎啲骨嚟煲湯畀男朋友飲，都已經覺得佢係天才廚神㗎啦，點知台灣都一樣有善用雞骨嘅高手呀！

話說有個超強嘅網民食完雞之後，竟然用堆正常人轉頭就扔晒去嘅雞骨，砌咗隻暴龍出嚟！以前聽老師講鳥類係暴龍嘅近親，都心諗有乜x嘢可能呀阿Sir你咪作大啦，但睇過呢張相之後，就有衝動返小學同阿Sir講聲對唔住喇……

唔係喎，諗諗下，佢砌到咁原整，會唔會根本唔係食緊雞，而係直頭食緊暴龍呀？！隻暴龍仔仲好似老鼠咁細隻就畀你食咗，真係冇陰公呀，知唔知咩叫保育呀？要食都應該食成長咗嘅暴龍，確保佢哋有機會繁衍下一代呀嘛，唔係佢哋好易絕種㗎！

睇真啲，個高手仲要幫暴龍戴埋大眼仔係咩玩法……雖然墊枱嘅報紙就寫住「猛獸」，但上面嘅暴龍就流露絲絲少女情懷，真係咩霸氣都失晒呀。唔知暴龍哥見到，會唔會想講句「我叫咗你班hi仔幾hi多次，有客人喺度就唔hi好丟我架呀嘛」呢？

封面圖片、資料來源連結：吳俊逸

延伸閱讀：【點做到】日本強人用炸雞骨神還原王者基多拉