可以做到長腿女神，相信係每個女仔嘅共同理想。著咗高踭鞋之後，成個人高咗成吋，仲會不自覺咁挺胸收腹，真係好有女人味㗎！不過係自己想打扮下嘅時候著就話開心啫，如果係因為返工規定要著，感覺就真係差好遠喇，話晒著高踭鞋都特別易攰，仲好易刮親㗎嘛，你估真係「我著的高踭高過人～要愛得比當初勇敢～」咩！

台灣有個要著高踭鞋返工嘅妹豬就話佢對鞋好刮腳，所以就偷偷地踩住個踭喇。睇張都覺得佢即時感到腳踭大解放，連腳趾都聞到自由嘅空氣呀～點知就畀同事話佢咁樣著好核突喎，咁又係嘅，舒服同美觀，似乎從來都冇喺女裝鞋嘅世界同時出現過……

灰姑娘個家姐斬咗隻腳趾夾硬塞隻腳入鞋，都話有機做到太子妃呀，呢個妹豬都係打份工啫，受人二分四冇理由腳趾都斬堆咁大犧牲喎。

於是，佢就諗到一條絕世好橋：踩住個鞋踭再用電線膠布包實個腳踭喇！毛毛終於都明點解服務業多數都著黑色高踭鞋喇，原來係方便同事可以經理不知客人又不覺咁黐電線膠布呀！

其實電線膠布除咗救到畀高踭鞋刮腳嘅服務業姐姐之外，仲幫到班冇錢買皮鞋嘅學生！話說台灣有間中學嘅樂團參加比賽嘅時候，當中有啲學生因為家境唔好，買唔起皮鞋，所以就用黑色電線膠布黐實對波鞋嚟上台演出喇。估唔到電線膠布原來咁有用㗎，真係想唱返句「黑色膠紙給他的意義」呀！

封面圖片、資料來源連結：魯夫妹、東森新聞雲