睇啲報紙成日話阿邊個同唔知邊個又鬧不和，邊個前輩又唔鍾意邊個後輩，都唔知係咪真嘅，有冇咁多不和呀？呢個社會就係畀你哋啲人分化晒呀！原來唔止普通人會鬧交，就算再和諧嘅超人，都會有內閧嘅一日㗎！

你睇下高斯頭耷耷眼濕濕咁畀超人之父指住嚟鬧，真係好慘慘豬呀，唔知佢究竟做錯咩，搞到超人之父咁嬲，要係大庭廣眾面前咁鬧佢法呢？

超人之父你唔好咁嬲啦！你睇下高斯咁sad，佢都知錯㗎喇⋯⋯做仔嘅超人太郎見到高斯畀老竇鬧得咁慘都忍唔住拍一拍佢膊頭安慰佢呀！

太郎：「我老竇係咁㗎喇，畀佢鬧兩句下返啖氣啦⋯⋯乖。」 

咁究竟高斯做錯啲咩？咪係衰「行得太前」囉！有知情人士提供咗呢張大合照，作為後輩嘅高斯影大合照嗰陣，唔知係咪同咁多傳說級嘅前輩一齊太開心，竟然衝咗上前7呀！仲要搶晒啲前輩fo，而家啲後生真係呢～又難怪超人之父咁嬲豬嘅，高斯你都係學下佳亞同Orb咁跟下隊形，唔係一陣畀人DQ就唔好啦～

封面圖片及資料來源：peruzeromax／twitter