主子貴為貓星人，愚蠢嘅人類又點會咁容易明白佢嘅心意呢？主子連送禮物都特別過人㗎～當人哋仲係買啲現成嘅花同公仔送畀人咁冇誠意，主子已經親自去捉啲甴曱、簷蛇、雀仔，甚至捉蝙蝠送畀你喇！係你啲人類唔識欣賞咋嘛。最近主子又有新搞作喇，但係貓奴就唔多接受到囉。

主子一定係見奴才冇銀用，所以學用人類廁所，等奴才慳返啲貓砂錢頂喇～但係主子你咁樣成個身瞓晒入去，叫每日對住你又攬又錫嘅奴才情何以堪呢？

但係主子似乎笨唔係當佢喺廁所咁簡單，仲要當正係自己張龍床咁坐到唔捨得走呀！主子，你起駕啦好嗎？奴才冇廁所用好慘㗎⋯⋯

你以為用坐廁就冇事喇咩？奴才，你實在太傻太天真喇⋯⋯主子做咩咁睇唔開成個頭塞入去呀？嗰個係廁所唔係飲水機呀！唉～唔通主子知道嗰度啲水冇含鉛又要話你知咩？你睇下主子嘅眼神，佢想話：解釋都費9事呀。

聖上：「大膽奴才！你竟然咁樣捉住朕！」

奴才你又係嘅，輕手啲呀嘛，一陣整親主子嬌嫩嘅身軀點算呢？聖上息怒，其實呢個貓奴都係怕廁所啲水飲到你肚仔痛，先出手救駕啫～睇完呢篇嘢，你係咪都突然覺得屋企主子嘅身上有陣熟悉嘅味道呢⋯⋯ 

封面圖片及資料來源：愛貓／今日頭條