之前日本同韓國興起咗一股用零食砌書包嘅熱潮，貪佢食得又睇得吖嘛～不過咁，整咁耐都淨係識整書包，好悶啫，畀啲新意嚟好喎～台灣呢個師姐就唔同呢，做得人哋直屬，即係Mentor，要送All Pass糖畀師弟，一係唔送，一係就重搥出擊啦！（等毛毛解釋下啦，香港嘅大學生臨到考試季節，就會由組爸媽送過三利是畀組仔女呀，但係台灣就興由一對一嘅「直屬師兄姐」送All Pass糖畀師弟妹嘅～）

嘩！使唔使砌成獎盃咁浮誇呀？咁話明叫All Pass糖，係對師弟考試嘅祝福，師姐梗係想佢凱旋而歸啦！所以送個獎盃畀佢都好合理啫～但係望落去似第二樣嘢多啲喎⋯⋯

明明就係一個叉住條腰嘅大隻佬！你睇下佢個廣闊嘅胸襟同強勁嘅臂彎～砌成咁師姐你有咩暗示先？唔通想佢好似人哋一百蚊四隻咁，越食越大隻？

不過砌獎盃呢啲都濕濕碎啦～古乳有暈，拜得神多自有神庇佑，見你上次考衰咗，師姐特登砌到啲零食成個果籃咁，連埋生果畀你拎去臨急抱佛腳，有埋佛祖加持仲唔過三爆四？入面仲要有埋今年好hit 嘅Apple 同 Pineapple，即場跳返場PPAP求分舞實掂呀！

有個咁有心思嘅師姐，呢個小師弟真係好幸福呀～你係咪諗緊自己個組爸組媽點解當年冇整呢啲嘢畀你呢？諗咩呀，你連Ocamp都冇得去，邊有組爸同組媽畀（糖）你食啫。

封面圖片及資料來源： dcard