大家有冇試過種嘢呀？毛毛唔係講緊種票，毛毛真係講緊種植物喎。睇住自己親手種嘅植物一日一日咁長大，仲要爆埋果實出嚟嗰下，真係好有成功感㗎～之不過學Do姐話齋，意外即係意料之外，你以為你種到個果實出嚟就代表你有得食㗎喇咩？

話說有位台灣媽媽就含辛茹苦咁湊大咗粒青檸，大家睇下粒青檸望落幾靚仔，青靚白淨都叫做中咗一半，而且仲要生到咁大隻?，睇嚟呢位媽媽一定落咗唔少心機同時間去栽培佢頂嘞。好！而家就等我劈開佢，將呢個巨型青檸入面滿嘅果肉拎出嚟啦！

咦，說好的果肉呢喂？拳頭咁大個青檸，切開你畀啲咁嘅嘢我睇？唉，呢位媽媽最初仲要懶威威咁叫齊全屋人見證傳奇一刻?㗎，你叫呢位媽媽以後點面對屋企人啫？Molamola……個青檸厚面皮成咁，真係連媽媽嘅面子都冇喇……

btw，呢位媽媽又唔使太傷心嘅，雖然阿檸個面皮係厚咗啲，內涵又少咗啲啲，但至少個內裡都係結結實實吖。唔似得而家啲空氣包咁，正一空心老倌，望落漲卜卜，咬開得陣風咋～

封面圖片及資料來源：連環泡有芒果／Facebook