日本成日出啲地區限定同季節限定嘅雪糕，真係睇到都想食呀！不過出咁多會唔會有伏㗎？之前嗰個麻婆豆腐雪糕，都係個樣似啫～聽講食落都好味嘅，但係如果掉返轉個樣冇特別，個味聽落奇奇怪怪，咁就似乎好伏喎⋯⋯

有個日本網友想買杯雪糕食下啫，點知睇清楚先知中咗伏，咪放上網同大家開心share囉。望落都冇咩特別吖，得隻又鮮明又出眾嘅螢火蟲印喺個蓋度啫，都幾可愛咁呀～但原來呢隻螢火蟲唔係一個Logo咁簡單，係代表呢杯雪糕嘅味道㗎！下？螢火蟲係咩味㗎？既然都買咗，咁呢位網友就唯有鼓起勇氣照食啦！

點知一打開⋯⋯蜜蜂嚟嘅喂？！你唔係加pat金箔落去就當係螢火蟲呀？毛毛讀得書少啫，但係都識分螢火蟲同蜜蜂㗎喎，你有本事搵到隻起間仲要條尾有針嘅螢火蟲就當你贏！

有網友就即刻PO返隻舊款出嚟，嗰Pat 望落似係便便多啲嘅金箔都仲喺度，但係起碼塊古古力望落唔似蜜蜂吖，雖然同螢火蟲仲有一段距離⋯⋯咁點解新版好地地要搞到佢成隻蜜蜂咁呢？唔同螢火蟲唔當造，要搵蜜蜂頂住先？

不過算啦，食嘢最緊要都係個味吖嘛～ 究竟螢火蟲咩味呢？網友就表示囝囝食咗一啖就嗌苦唔食喇，學古人話齋，一試無妨，再試投降喎。另一個聲稱都有食過嘅網民就好強調咁話係芝麻味、芝麻味同芝麻味，見佢講三次就知幾重要啦～其實名呢家嘢都係噱頭嚟啫，你整隻雪糕叫「家明的味道」，都應該有好多人買㗎！

封面圖片及資料來源：pirorit_tw／twitter