網購最傷心就係等咗佢咁耐，但係件貨寄到嚟竟然爛咗呀！所以買啲易碎嘅嘢嗰陣都會叫買家盡量包多幾層泡泡紙同埋希望速遞哥哥可以輕手啲～不過美國就有個藝術家反而就想速遞哥哥幫佢整爛啲嘢喎！

呢位藝術家Walead Beshty搵咗出名使命必達嘅速遞公司幫手，喺呢九年入面將大大小小唔同形狀嘅玻璃箱寄去唔同地方嘅畫廊同展館，仲要一送到去就由當地職員拆箱做展品喇。

嘩，咁就叫做藝術品，咪好著數？其實佢都要做返啲嘢嘅，就係要將啲玻璃切割，然後砌成同寄件盒Exac7ly一模一樣形狀大細嘅箱，仲要特登唔黐易碎標籤，等啲速遞員唔好咁錫住份件先做到咁嘅效果咋。佢特登做到同寄件盒一樣就係想表達每個玻璃箱雖然喺限制底下係一樣，但係喺旅程當中造成嘅裂痕，會因為佢哋嘅經歷而有所不同。咁咪好似人咁囉？以毛毛9估，呢個一定係比喻嚟嘅，55，一定係咁喇！

不過唔黐易碎標籤個箱都只係裂咗冇碎晒，都已經要畀個like啲速遞哥哥啦！咁如果速遞哥哥重手咗碎晒點算呀？唔緊要～咁你都可以用15分鐘嘅時間欣賞啲碎片㗎嘛，話唔定仲會比平時見到嘅藝術品嘅形態更美呢？所以話，只要有心，人人都可以做到大文豪同藝術家㗎！

封面圖片及資料來源：Colossal