喺香港就要去行山影相呃like，去日本識影相就梗係去啲神社度影啦～尤其係佢個手水舍，真係好有feel㗎～有石做嘅水盤，再加埋啲竹同流水，最啱就係畀著住和服嘅娘娘拎住個竹水殻淨手漱口嗰陣叫啲兵幫佢影仙氣相喇！

趁呢個機會等毛毛順便袋錢入你哋袋啦～呢個手水舍係畀參拜者淨心同淨身用嘅。所以要跟足步驟，只可以拎一次水，用右手拎竹殼裝一殼水就洗左手，再轉手拎個竹殼洗右手，再用右手接住啲水拎嚟?口，唔好吞，要吐出嚟，再打棟個殻用淨低啲水洗柄。嘩！咁多步驟點記得晒呀？

而家咩都要講快講現代化，神社梗係要與時並進先得啦～ 雖然話一切從簡啫，但點都估唔到神戶呢間神社連手水舍都要改革，變咗洗手盆呀！咁以後仲點一邊洗手一邊影相呃like呀？真係世界末日喇！慘無人道呀！

雖然係冇咗啲特色，不過有人話咁樣整係衛生啲嘅，況且變咗洗手盆，咪唔使擔心做漏Step囉～況且，參拜神社最緊要唔係呃like，係了解當地文化同尊重神明呀嘛～btw，話唔定神社職員就係見某啲遊客睇唔明呢個地方係用嚟洗手漱口，成日拎咗嚟飲水洗腳，咪直程改埋做洗手盆，咁就肯肯定知道係用嚟洗手，唔怕褻瀆神明囉～

封面圖片及資料來源：molamolaichi／twitter 、維基百科