有一種辛酸，係男朋友同兵仔先會明白，就係同自己嘅另一半或者女神影相！因為手長嘅你，一定係擔當自拍神棍嘅角色。之但係要成功影到一幅佢哋滿意嘅相真係一啲唔容易，你以為識高炒就夠咩？仲要睇埋構圖、景深、光線（下刪一百樣因素）……唔想影到女神變黑面神，咁就要跟呢位隱世高手學嘢喇！

冇錯，就係呢隻住喺於動物園人造竹林入面嘅熊貓！你咪睇佢肥嘟嘟又有個大黑眼圈咁呀，就係咁都可以影到自己咁cute cute先強呀嘛～

熊貓表示：「你頭先個angle都唔錯，但係如果再左少少……你睇下係咪當堂靚咗又瘦咗呢！」 

除咗角度之外，其實擺咩甫士對selfie嚟講都好重要㗎啵。大家睇下，呢位熊貓唔止識得側頭扮打耳，佢仲識用自己隻軟綿綿又毛茸茸嘅手仔托住個下巴呀，估唔到佢擺起呢個甫士上嚟又幾elegant喎～再加埋佢對咁精靈嘅眼仔，真係想電死人咩！

喂呢位女女，隻熊貓咁好心教你咁多selfie秘技，你竟然恩將仇報，將佢嘅醜態影低？人哋都未ready好個靚樣你就影咗，實在係太過份喇！好彩佢天生識得望鏡頭，連食嘢都保持住最上鏡嘅一面啫～

between，雖然毛毛都知大家一定好想同呢隻熊貓自拍，不過佢而家已經冇再同人自拍好耐㗎喇，話晒熊貓始終都係舒舒服服咁生活先係最自在呀嘛～仲應酬你哋班人類？睬你哋都有味啦。

封面圖片及資料來源：雙流公興街道／微博