平日睇埋咁多講魔法同鍊成嘅動漫，真係好想自己試下畫魔法陣呀，如果仲可以好似拍戲咁有個發光嘅魔法陣喺手，一定超有型，啲女女見到都會尖叫啫！唉，但係魔法嘅嘢，毛毛識條魔杖咩～

傻豬嚟嘅，原來唔使識魔法都可以有發光魔法陣喺手㗎喇，就係自製一個3D魔法陣喇！材料好簡單，唔係雞蛋六隻同糖兩茶匙呀，係普通嘅透明膠片同埋螢光嘅布繪顏料，只要起個靚稿，再用布繪顏料跟住個稿嚟畫，之後再將啲膠片組合埋一齊就得喇。

然後就將個砌好嘅魔法陣吸收下天地靈氣同日月精華，如果嫌麻煩嘅，買返個UV電筒照下都得㗎，效果一樣啫～咁就完成咗一個發光嘅手中魔法陣喇！

不過呢位網友嘅本事笨唔止咁少，原來除咗魔法陣，佢仲開咗個Blog教大家整各種魔幻風嘅道具，好似呢支魔杖咁，只係用咗鐵通、一百円店買嘅噴壺、仲有園藝用鐵絲等等嘅材料就整到出嚟，係咪估佢唔到呢！所以話，只要有心思，豆漿都可以變白膠漿啦～！（高八度）

封面圖片及資料來源：mitragyna／twitter、黑の鍊金術學會