香港人最緊要係咩呀？買樓囉。要買樓，即係要人工高啦；要人工高，就要入大公司、搵份好工；要入大公司，就要入大學……數下數下，都好難怪而家啲小朋友兩歲就要背乘數表嘅！

唔知老師係咪覺得細路哥大得快，做功課都自然會好快呢？一日竟然有十幾廿樣功課呀！好彩有一樣係簽通告啫，遞畀媽咪之後終於可以唞啖氣！

而最近喺「不願小朋友成為功課奴隸」group入面，就有個媽媽話自己收到囝囝親手寫嘅信，問咁多位家長如果遇到相同情況會點做喇。

讀緊小二嘅囝囝本身有返功課補習班嘅，不過媽媽覺得朝七晚七對小朋友嚟講太辛苦，所以已經停咗補習班幾個月喇。而家囝囝一個星期補習四堂，本身以為會輕鬆啲，點知囝囝就寫信同媽媽講「你天天叫我學溫（習），我想在星期日玩」，真係睇到都心酸呀。

毛毛同呢位媽咪傾過，佢話會聆聽囝囝嘅心聲、再分配下溫習同休息時間，希望學校醒覺功課係學生嘅壓力來源，可以作出調整減量。小朋友嘅心聲，我哋收到喇，學校同焗腸你哋又收到冇？

封面圖片、資料來源連結：不願小朋友成為功課奴隸

延伸閱讀：

【放學零功課？】家長狂post手冊相 最多有24樣功課！

【家長唔一定怪獸】唔想小朋友做功課奴隸