強國出咗咁多山寨比卡超玩具，真係驚嚇到比卡超都冇眼睇呀，但係你以為山寨嘅比叉燒只係喺啲玩具度搵到？少年人，你太年輕喇。比叉燒已經成功潛入日常生活嘅用品之中，真係創作力量同幻想，會嚇你一跳呀！

都話唔好亂玩交換禮物㗎啦～出事㗎嘛！不過呢隻比卡超⋯⋯都算係眼口鼻都正正常常呀，係對耳仔黐埋咗啲，個肚仔又變白咗，望落似兔仔多過老鼠啫，咁比卡超原型都係鼠兔，既然都是兔就不用分得那麼細啦～

嘩！你大我呀？無啦啦伸長條頸想點呀！仲要咁幼就唔好伸出嚟獻世啦⋯⋯但原來呢嚿嘢係一盞燈，而真正嘅災難係喺開燈之後呀！

你呃人！呢隻明明就係日本妖怪長頸女，分明就係想變做比叉燒嚟迷惑毛毛！你唔使旨意呀！嗚⋯⋯收到盞咁嘅燈，仲要日日對住佢，以後仲點面對又圓又可愛嘅正牌比卡超呀！

其實呢啲都係幻覺嚟㗎啫，嚇我唔到嘅！只要打側佢擺，然後每日催眠自己，佢係長頸鹿⋯⋯佢係長頸鹿⋯⋯咁咪冇事囉！咁點解呢盞燈唔一開始就整成長頸鹿樣，咁咪乜事都冇囉？Well，強國出品嘅嘢，畀你估到嘅就唔係強國啦⋯⋯ 

封面圖片及資料來源：dcard