成日都話去人屋企唔可以帶兩梳蕉，你知唔知點解先！唔係因為冇體面、會失禮呀，而係成兩梳咁多，人哋邊食得切喎，轉個頭擺到黑晒咪唔食得，做咗大嘥鬼囉！不過如果你有咗呢支神奇嘅筆，就可能反而會期待條蕉快啲變黑喇。

呢支係日本新出嘅神奇畫筆，佢嘅墨水其實係食用醋，可以令蕉皮慢慢氧化，變做黑色。即係話，寫咗落蕉皮會暫時隱形嘅，過多一段時間，上面嘅字先會慢慢浮現㗎。遂漸變黑就得，想立即變黑晒，就唔得喇。

神奇香蕉筆喺自動販賣機有得賣，仲連埋隻蕉一set咁，只係150円咋～

有得食又有得玩，日本網民們梗係紛紛買嚟試下啦～不過睇嚟畫完之後，又唔隱形得晒啵，都係隱隱約約見到啲筆跡，想買嚟寫粗口就可以死咗條心佢喇。

過咗五分鐘，蕉上面畫過嘅位已經明顯深色咗喇！再過多陣，就見到幅好靚嘅畫喇！

大家都係黃色，用嚟畫比卡超就啱晒～出嚟啦，比卡蕉！

對自己畫功有信心嘅話，用嚟寫生，對住狗狗照畫都一樣得啫。畫得咁似，叫人點捨得食呀？

不過再擺耐啲，條蕉就黑到……睇嚟神奇香蕉筆用嚟寫字或者畫線條就ok，油一大片就搵鬼食返條蕉喇。雖然香港冇得賣神奇香蕉筆，不過聽講自己用白醋畫都可以有一樣效果㗎，今晚就買梳蕉返去試下先！I have a pen～I have a banana！呀！

バナペンで描いた唐草模様、時間がたったらくっきりしたでござる。 pic.twitter.com/ZDLRgT85HE

— 古書カフェ_くしゃまんべ_竹内 (@KMB_oji) January 9, 2017

家帰ったらめちゃめちゃ濃い絵になってた #バナペン pic.twitter.com/39CGB67WVd

— こたろ (@KotaroYasuda) January 13, 2017

封面圖片、資料來源連結： KMB_oji／twitter、KotaroYasuda／twitter、nsktdeluxe／twitter