開親新電器，阿媽梗係會喺側邊叫你快啲睇下說明書點用，傻豬嚟嘅，新一代嘅聰明小寶寶又點會咁乖睇說明書㗎，當然係自己亂撳一輪，著到機咪得囉，梗係搞唔掂先睇說明書㗎嘛～不過呢類人好多時都忘記咗一件好重要嘅事，開得著笨唔代表發揮到佢本來嘅功能㗎！

好似呢位日本嘅網友，見部空氣清新機用咗兩年咁污糟就諗住幫佢洗白白，咁先可以Keep住呼吸到清新空氣㗎嘛。洗機前就梗係要拆機啦，最啱就邊拆邊唱「如果你願意一層一層的剝開我的心～你會發現～你會訝異⋯⋯」

今次唔慌唔訝異喇！用咗部機兩年先知自己由頭到尾都冇拆開外面隔塵網個膠袋呀！唔緊要喇，仲有裡面嗰層過濾網⋯⋯咦，原來裡面嗰層都仲有膠袋㗎，簡單嚟講，佢哋係從來冇用過個隔層網。咁開咗部空氣清新機兩年有咩用呢？呃⋯⋯心理作用囉。

佢見今次自己咁?，咪PO上網畀大家恥笑下呃下like，叫做彌補下心靈創傷吖嘛～點知佢發現，原來世界上仲有好多同佢一樣嘅7頭，開咗部機兩三年先知自己冇拆膠袋，真係生命滿希望呀！

你睇下個膠袋幾dirty? 咁都起碼隔走咗少少塵吖⋯⋯個膠袋。正能量啲咁睇，你有一部用咗三年但係拆開膠袋仲好似全新咁嘅機呀！

有網民就溫提大家，其實廠商都已經怕咗你哋班友仔，所以黐埋張說明書落部機度提你哋拆膠袋㗎喇，所以唔想再7都係乖乖哋睇說明書啦～各位家庭觀眾都不妨而家拆開部空氣清新機睇下喇，話唔定今個雞年有部「新」嘅中古機用呢？

封面圖片及資料來源：aasans2s2／twitter