去日本真係邊度都咁好行，就連超市都特別多嘢睇㗎～大阪有一間玉出超市，就出晒名又抵又多款式，不過去旅行通常都係去賣零食同熟食，所以好少發現到，原來新鮮食品部都有好多打耳嘢㗎！

今期玉出超市就得有賣一樽樽嘅「海天使」喇！咦，睇落細細條，咁似細個玩嗰啲神奇水馬騮嘅？但係佢放喺啲蝦同刺身隔籬㗎喎，唔通要你啲人養大佢先有得食？

睇真啲個牌，人哋係寫到明「觀賞用」呀，你哋啲人仲成日掛住食食食～其實海天使係一種好罕見嘅生物，本來係喺南北極海域先見到，係近呢幾年先喺北海道出現，再引入去大阪賣咋。日本叫佢哋流水天使，係吉祥嘅象徵嚟㗎！呢位網友咁難得見到，梗係要買返樽嚟養下，睇下會唔會新年行大運啦～

睇返張單⋯⋯咦！明明買咗樣唔食得嘅嘢，點解話人哋買咗刺身嘅？咁即係觀賞用定食用呀，媽呀好亂呀！死啦，畀老婆睇到會唔會以為瞞住佢「偷食」㗎？不過店員又錯唔晒嘅，魚生又係生，條海天使都係生勾勾嘅啫，大家都唔你咁熟，就唔好理佢咁多啦。

封面圖片及資料來源：zou_da_zou／twitter、日本気象協会