（溫馨提示：以下圖片只適合已經冇書讀，冇得出貓人士觀看。）

老老竇竇，有邊個讀書嗰時冇出過貓呀？話就話落堂同同學一齊溫書，其實偷偷地夾手夾腳炮製貓紙就真！唔好一味鬧出貓嘅同學懶呀，其實佢哋一樣好勤力，不過就用喺炮製貓紙呢方面啫。貓紙呢家嘢其實係一門學問，太大張又易穿煲，太細張又唔夠位寫notes，測驗嗰時緊張到眼花花仲可能睇唔切?！

仲未明呀？咁就一齊嚟睇睇呢個錯誤示範啦。俄羅斯有個大學生為咗出貓，竟然準備咗張成3.6米長嘅貓紙入試場呀！點解會長成咁？咪就係因為佢將教授可能會出嘅35條題目全部都抄晒落去囉，都算係準備充足嘅，55。

雖然炮製咗成個禮拜，仲特登搵大大張牆紙嚟寫，不過大張成咁，真係收都收唔埋啦，成卷咁拎入試場，都未坐低就畀阿Sir見到啦大佬，係咪想搞事先……唔知阿Sir準備對於自己教咗個連出貓都出成咁嘅學生出嚟，有咩感想呢下？

想出貓啫，使乜咁辛苦呀，學下嘢啦。將細細張貓紙攝入而家每興嘅破爛牛仔褲入面，趁老師擰轉面，咪可以撥開雲霧見青天囉！毛毛終於明點解以前個roommate明明淨係落去考一科，唔換件hea爆hall tee都要換過條牛仔褲喇！

嗱，毛毛唔係鼓吹作弊呢種不誠實行為呀，一早話咗讀完書嘅朋友先好睇㗎！不過就算你讀緊書又睇咗都冇用啦，都用唔返呢招，因為可能你老師都睇到吖嘛！

封面圖片、資料來源連結：每日郵報、永遠在戀愛／微博