對於地獄黑仔王嚟講，扭蛋最痛除咗抽唔到自己想要嗰隻，莫過於係抽到幾隻都係重複呀！抽親都係嗰一隻，唔通連個天都唔鍾意我？不過偉大嘅「笨大」，知道大家嘅慘況，今期出嘅Gundam扭蛋唔止可以瘋狂加零件，仲開放投稿等大家發揮創作力量同幻想，咁咪重複100隻都唔怕囉～

Yo，抽到一樣扭蛋啫，使乜驚呀！咪幫佢加多幾支槍囉～增強火力之後，啲霸氣含含聲咁湧緊出嚟呀！

嘩！呢部集合咗咁多種殺人武器於一身嘅超級武器霸王，莫非就係攞你命3000？咁如果抽到重覆嘅唔係槍又點先？

「渣古百烈拳！」 咪住先，你唔好呃毛毛唔識嘢喎，呢招分明係路飛嘅橡膠機關槍啦！唔通渣古只係佢表面嘅掩飾，路飛先係佢嘅真正身份？

邊個話玩高達一定係打打殺殺㗎，玩高達都可以好溫馨㗎，話晒都新年，梗係應下節玩下「板羽球」喇～日本妹豬打板羽球就用個好似毽嘅波，咁高達打羽板球就梗係用⋯⋯手榴彈？！

呃⋯⋯新年流流都係唔好玩啲咁危險嘅好啲，打下韆鞦、玩下連步舞咪好囉，你睇下高達同渣古玩得幾開心～渣古仲拎埋碌棍出嚟「鼓勵」高達要刷新紀錄?～高達你得唔得㗎，使唔使借支WD-40畀你呀？

點解佢哋玩咁多女仔嘢？其實渣古嘅少女心又有誰共鳴呀？所以，呢個毛文佢要爆喇！變身！佢嘅志願其實係成為魔法少女渣古子呀！佢而家仲招緊Fd子?，快啲捉住佢隻手仔join埋佢玩啦。一齊嚟～派派幫幫 普哇普哇普 ～

封面圖片及資料來源：the wonder、動畫《海賊王》截圖