唔少人放假都鍾意去動物園玩，因為可以親親大自然，又了解下唔同動物嘅生活同習性吖嘛。

之不過，有位來自澳洲嘅三歲小朋友去完動物園竟然一啲都唔開心，反而仲好嬲嬲豬?？到底點解呢，而家等毛毛同大家一齊睇下啦！

話說呢位小朋友就叫Ollie（雖然個樣生得幾靚女呀，但其實人哋係男仔嚟嘅），舊年十月佢嘅父母就帶咗佢去墨爾本一個動物園度參觀，點知喺返屋企嘅途中，Ollie諗返起頭先個動物園就突然嬲起上嚟，仲話動物園啲人唔係好人喎！下，Ollie做咩咁講呀？唔通動物園嘅人對佢做咗啲咩？於是爸爸媽媽就即刻問佢咩事啦。

呢個時候Ollie就仲嬲，佢話：「啲人將啲動物困住係唔啱㗎，佢哋都冇曳曳做壞事，嗰個根本係監獄嚟！」

而Ollie媽媽事後都話，其實Ollie喺參觀動物園嗰陣已經好激動㗎喇，佢根本就唔明點解啲人要將動物困住，仲猛話嗰度係監獄?。媽媽都估唔到呢條上年十月拍嘅片，隔咗幾個月之後會引起咁大迴響。

到底係動物園定動物監獄？呢個問題或者未有答案，但Ollie呢番說話都好值得我哋反思。

資料來源：CatersTV、Dodo Impact、dailymail