2017年01月19日 星期四
黃曉明工作室用霧霾顆粒整戒指？
眾所9知，日前黃曉明同老婆Angelababy嘅純天然製品已經出咗世，而黃曉明事後都upload咗一張BB手仔相上微博向一眾同胞報個母子平安。
唉！淨係up隻手仔又唔up埋BB個樣，懶係神秘咁，真係搞到毛毛好想知BB個樣……到底似爸爸多啲定似媽咪多啲呀！
而唔講唔知，呢兩公婆除咗努力為國家造人材之外，原來仲好重視環保㗎！今個新年，佢哋就專程設計咗一個名為「筷筷生子」嘅新年禮盒，入面嘅日曆、筷子、賀卡乜乜物物全部都係佢哋自家設計，印有「ah」嘅字樣，a即係代表angelababy，而h咪即係代表huang xiaoming（黃曉明）囉。
喂老老竇竇，雖然自家設計新年禮盒係幾有心思，但環保在邊度呀？
登登登櫈，之唔係呢隻中國限量版霧霾戒指囉！
大家唔好睇佢隻嚿膠咁，其實呢隻戒指好有意思㗎，佢上面嗰嚿黑色嘢咪就係用霧霾顆粒製作而成㗎囉。佢哋仲話每整一隻戒指就相當於淨化咗北京1000立方米嘅空氣，實行「用行動來支持環保，還下一代一片藍天」咁話?！
不過咁，咁偉大嘅戒指當然唔係單憑黃曉明工作室就可以做到啦。聽講呢50隻中國限量版霧霾戒指係由黃曉明親自聯絡有份參與中國「減霾計劃」嘅荷蘭團隊先整得成㗎，呢啲咪叫有face屎囉！55！
btw弱弱一問，乜…乜中國唔係話冇霧霾㗎咩？
