話咁快就到新年，除咗要執乾淨間屋之外，梗係要營造一下新年氣氛，例如黐下揮春咁啦！雖然坊間有好多款式，但始終都係自己寫嘅嘢先啱心水嘅～咩話？你話你手字好醜樣，寫完都唔好意思掛出嚟？唔緊要，趁仲有時間，不如跟日本自衛隊學下點寫毛筆字吖！

喂，用科學毛筆寫咁弱雞，識寫毛筆字梗係用地拖嚟寫啦～大家睇下，佢哋竟然用挖泥機嚟夾住支地拖咁都寫到大字喎！果然有霸氣呀下，咁大隻「元」字先叫做大字㗎嘛。唔知佢哋想寫咩呢？

新年就梗係寫「元旦」啦，唔通寫「元華」咩？老老77，要用挖泥機控制支地拖寫大字真係少啲技術都唔得㗎，睇下班隊員幾肉緊……嗱嗱嗱，唔好失手呀，失咗手今晚冇飯食㗎！好彩都叫寫得是是正正，阿sir應該收貨喇啩？

而寫得咁辛苦就梗係要影返張大合照啦～其實呀，呢班自衛隊而家喺好遠嘅南蘇丹當緊值，所以咪想用特別嘅方法向日本市民同屋企人拜個年咁囉，希望佢哋都可以快啲收工同屋企人團聚啦！

封面圖片及資料來源：Southwood_／twitter