雖然大笨象就唔一定識跳舞，但係平日見佢哋咁幫得人類手都知啲大象夠晒醒目同善良啦。不過有啲人類就濫用大笨象嘅善良，夾硬訓練佢哋一啲特別嘅技能或者用武力逼佢哋載人，真係好過份呀！好彩呢個世界上仲有好多尊重同愛護大象嘅人。好似印度呢班村民咁就抵讚嘞。

印度最近有冷鋒令天氣驟降，雖然大象都叫皮粗肉厚，但係天氣反常搞到咁凍佢頂唔頂得住㗎？話晒係大笨象唔係長毛象啵。有好心嘅村民怕佢哋凍親，於是織織復織織，起勢係咁織，終於幫佢哋織好件冷衫啦～

織完仲有埋專人服侍佢哋著上身?，真係好嘆呀～隔籬個隻唔使妒忌喎，人人有份，永不落空㗎～

仲要每一件衫都唔同花款，呢班村民真係有善心得嚟仲好有fashion sense啵～btw，毛毛都覺得空虛寂寞覺得凍呀，可唔可以織多件嚟呀？咪睇呢班大象咁爽歪歪，其實佢哋捱都過好多苦，畀義工救返先有好日子過咋。順便喺度溫提下大家，唔想見到啲大象咁慘慘豬，就記得要向勞役大象同象牙賣買說不喇！

封面圖片及資料來源：the dodo