2017年01月22日 星期日
【點做到】日本神之手雕到條蘿蔔咁樣樣
出街食嘢，一係食味道一係食環境（即係幫人交租），邊有人理咩刀功㗎，反正食入口都係一樣味㗎啦，咬幾咬吞落肚咪又係咁。不過對食材有執著嘅人嚟講就唔同喇，刀功，係一種永恆嘅追求，係一種高深嘅境界！
講起切蘿蔔，你會諗到幾多種切法呀？切到一條條、一片片，最多咪畀你諗埋滾刀切一嚿嚿囉！點諗都唔夠呢個日本神之手咁勁㗎喇，嚴格嚟講，佢唔係切，而係雕！仲要雕到個蘿蔔好似鎖鏈咁，一圈扣住一圈，中間完住冇斷開㗎，唔係親眼見到都唔相信世上有咁勁嘅雕功呀！
毛毛見識少，以為雕到條蘿蔔咁樣樣已經好強大啦，但原來一雕還有一雕勁，之前有個日本雕刻家山崎利幸都試過雕出條鎖鏈，不過就係用你估都估唔到嘅鉛筆芯嚟雕呀！
除咗雕鎖鏈，佢仲試過喺筆尖雕唔同嘅字，好似「合格」呀、「幸福」呀咁。佢練咗幾多年先練到咁嘅功力就唔知喇，淨係知邊個夠膽拎枝筆去刨，毛毛就會雕邊個！
板長が暇潰しに切った大根貰ったンゴｗｗ pic.twitter.com/3Q5Lg4ugCV
— ガイ・ジ・オーダー・ゴミオ (@Zoe_Aishiteru) January 21, 2017
封面圖片、資料來源連結：Zoe_Aishiteru／twitter、naver.jp
【神之手系列】
