就嚟年廿八，有冇乖乖地執屋大掃除先？就算你話有又點吖，睇死你咪又搬晒啲嘢出嚟，打開枱底嗰幾個封晒塵嘅紙盒，拎住啲舊相舊信慢慢回味從前，睇下睇下，發現已經到食飯時候喇，就擺返晒啲嘢埋原位就當執咗屋囉。不過搵返小學中學時期，好朋友寫畀自己嘅卡嚟睇，又真係好有回憶嘅，叫人邊捨得扔咗去呀～

幾年前嘅卡，一早收晒入紙盒保存啦，但係如果你係喺信箱發現，又會有咩反應呢？唔通張卡知你耐冇收信，偷偷地走入信箱扮有人寄嘢畀你？

話說台灣有個網民最近收到張賀年卡，咁都好正常啫，話晒都就嚟過年。奇就奇在張卡上面竟然有大大隻立體兔仔喺度㗎！而佢本人又唔係屬兔，邊個喺雞年寄兔仔卡咁玩嘢呀？

原來張卡係佢個老死喺六年前，即係兔年嗰陣寄畀佢㗎，點知就而家先寄到佢手上！由兔年寄到雞年，足足半個cycle喇大佬，郵差叔叔解釋下好喎？卡上面仲要用歪歪斜斜嘅字寫住「我們要當一輩子的好朋友」呢啲又pure又true嘅說話，真係咩回憶都返晒嚟！

聽講台灣有啲文青cafe可以畀客人寫信畀五年、十年後嘅自己，老闆等到適當時候先會幫你寄出嘅，而家唔使搞咁多嘢都已經可以收到被時間遺忘嘅賀卡，真係諗落都覺得浪漫呀，嗯嗯。寄信時間長又長，希望佢哋友誼更加長啦～

封面圖片、資料來源連結： dcard