成日話成功需父幹，其實成功嘅定義都好廣泛嘅，唔一定要有錢買樓畀個仔先叫做好爸爸嘅。好似某宣傳片話齋，肯「每日暫停十分鐘，聽聽少年心底夢」，就已經好難得喇。不過呢個老竇唔止聽囝囝講，仲同囝囝一齊你畫我又畫，真係好溫馨呀～

小朋友有無窮無窮小宇宙，所以連畫啲嘢都特別抽象，直程有畢加索嘅風範呀！呢隻嘢望落有啲似龍蝦，但係係藍色㗎喎，係咪中咗毒呀？仲拎住啲刀刀劍劍㗎喎！問清楚先知原來係「魔法騎士」！等老竇畫返你心目中嘅dream knight出嚟啦！

唔講仲以為係咩復仇長者聯盟嘅角色呀！仲要每個細節、每件道具都畫足晒?！咁犀利？再考考你先！

今次你唔明喇啩？以毛毛9估，一定係變態醫生一手拎住把刀，一手拎住個電鋸係咁殺人，所以搞到成身血啫！

古乳有暈，生仔實知仔心肝，就咁睇一幅咁簡單嘅圖，老竇都知阿仔想要「蒸氣龐克」風格，唔止幫公仔畫返套紅色禮服，仲畫埋支超有型嘅蒸氣針筒出嚟?！老竇你係得嘅！

今次唔會有錯喇！呢幅仲唔係一隻有青光眼嘅喪屍喺度拎住支槍亂槍掃射，55，一定係，除非唔係啫！

下，又唔啱？嘩～老竇咁都知個仔想畫改造人？仲要連個公仔戴面罩都知？畀呢個咁強嘅老竇畫完，即刻覺得囝囝設計啲角色真係好犀利、好有型呀！囝囝仲可以拎畀同學仔睇下自己諗出嚟嘅角色幾型仔?！雖然外人睇落好似係老竇勁，將啲亂畫嘅草稿變到好有型嘅動漫角色，但係對於老竇嚟講，囝囝先係佢嘅靈感男神呀！

封面圖片及資料來源：Thomasintokyo／twitter