開講有話：「年廿八，洗邋遢」，相信唔少人都開始大掃除㗎啦！

最近，有位台妹嘅見男朋友工作太忙唔得閒執房嘅關係，於是就出手幫佢執。就喺執嘢嘅期間，佢無意中發現原來男朋友一直將導致大家發生爭執嘅原因寫低，要嚟提醒自己唔好重覆犯錯、唔好再激女朋友？喂，哥仔你咁樣做壞規矩㗎喎……

呢五大規條包括：

1）每次有嘢食都要先問女朋友食唔食，就算佢口裏說不，你都要分畀佢食

2）去邊都要報到，唔可以令女朋友擔心

3）要學識按摩，因為女朋友鍾意

4）唔可以下巴輕輕，因為女朋友會記得你應承過佢嘅事

5）出街要執正啲，唔可以著街坊裝加踢拖

台妹頭盔mode：佢話自己唔係諗住偷睇男朋友嘅嘢，都唔係對男朋友有懷疑，只係咁啱佢幫男朋友執嘢嘅時候，呢本筆記突然啪一聲咁跌咗落地，仲咁啱打開咗呢頁，佢先睇到咋！55！

老老77，咁有心機整本《男朋友守則》出嚟喎，呢位男朋友就梗係做到呢五大規條啦～

而台妹見到男朋友咁重視自己都表示好滾動，同時又好擔心自己到底會唔會畀咗太多壓力男朋友……嗱嗱嗱，男朋友對你就咁好吖，咁你又點樣報答返男朋友先？講明先呀，收少幾隻兵唔計㗎！

any肥，雖然呢位廿四孝男朋友係幾值得欣賞（以女人角度），但要毛毛守晒呢五大規條真係好難囉！開心些牙、報到、學按摩、守承諾呢啲或者毛毛都做到，但唔可以著街坊裝同踢拖就真係有啲難度……又唔係返工，做咩唔可以畀毛毛著hea look喎？嗯，毛毛終於知點解自己……唉不要再說了。

資料來源：dcard