年廿八又係時候洗邋遢，其實可以執得晒啲N年冇打開過嘅櫃桶，仲有床尾嗰疊著過一兩次唔知拎去洗衣機洗好定係摺堆擺返入衣櫃好嘅衫，已經好大成就㗎喇，仲邊會咁好閒情逸致抹埋電腦主機入面啲塵㗎，有時間都去剪下頭髮好過啦。眼不見為淨，喺電腦入面污糟，又邊有人睇到㗎啫。

偏偏，台灣呢個後生仔就懶係乾淨咁，堅持打開4年嚟都冇打開過嘅主機。佢話最近發現部機成日都hand hand地，keyboard又冇反應，將個插頭重新插過都係唔掂，於是就打開嚟睇睇喇。

都叫咗你㗎啦，有啲嘢唔知好過知呀！而家見到入面滿滿嘅都係貓砂同毛毛，你開心啦！

呢個後生仔屋企有六位貓主子不特止，仲有兩位汪主子?呀，唔怪得啲毛毛多到可以堆個沙漠出嚟啦！

奴才，唔好怪主子搞到你hand機啦，話唔定佢哋以為派咗身上嘅貓毛狗毛潛伏喺電腦入面，就可控制到你上咩網，等你唔會睇其他喵星人汪星人啫！

封面圖片、資料來源連結：littlerivia／ptt