啲人成日以為小朋友咩都唔識，其實佢哋不知幾醒呀！只係見你哋啲大人服侍得咁好，咪費事show自己啲quali出嚟畀你睇囉～但係如果佢哋有任務在身，或者要達到某啲目標，個個都會即刻化身成為身懷絕技嘅非常小特務呀！

唔好睇少呢個細細粒嘅小妹妹Michaela，佢其實真正嘅身份就係超級特務天字一百零一號！爸爸媽媽用個咁嘅膠欄就想擋住妹妹，實在太睇小佢啦！要逃走，唔使爬欄嘅～用玩具頸鏈咪得囉～

睇下Michaela用純熟嘅手勢，一拉一扯，咁就畀佢成功爆欄走咗出嚟喇！兩歲未夠就已經咁冷靜機智，大個仲得了嘅！

不過啲大人成日都唔信啲小朋友會咁勁，以為妹妹只係一次半次咁好彩，所以又放咗佢入個欄度，以為咁就可以鎖住佢，你睇下Michaela幾唔高興？連個咀仔都扁埋喇。

古乳有暈： 出手便知有沒有，妹妹唯有show多次quali啦！唉⋯⋯人類總係要犯同樣嘅錯誤，又用返呢個欄？於是妹妹繼續用返佢條寶貝頸鏈拉一拉，又成功逃脫啦。真係易過飲奶呀！

今次Michaela妹妹仲要拎埋戰利品同媽媽示威?呀，你睇佢幾得戚？好心你哋畀啲難度嚟好冇，咁冇挑戰性㗎～媽媽見妹妹走甩咁多次，用電話錄影先知道成個「逃獄」過程咋，仲將啲罪證寄埋畀爸爸睇，真係嚇到老竇心都離一離呀。

其實阿爸阿媽又使咩驚喎，阿女細細個就識開鎖，簡直就前途無可限量呀！起碼返屋企唔記得帶鎖匙都唔使搵開鎖佬吖，最多係畀妹妹爆開埋主人房入面個櫃桶，拎咗你哋啲「玩具」出嚟玩啫～

封面圖片及資料來源：每日郵報