好多人都以為汪星人好打耳好溫馴，其實呢啲都只係形象嚟㗎啫～學子華神話齋，如果你相信個藝人嘅形象就係嗰個藝人，咁樣就叫天真！平日狗狗成日要喺你哋啲人類扮蠢，真係好攰㗎，最慘嘅係啲主人好似啲狗仔隊咁，一見到狗狗形象崩壞就影人哋上網，叫狗狗情何以堪呢？

好似呢隻汪汪咁，同fd子嗌緊交，嗌到最肉緊準備開佢拖嘅時候，竟然畀佢發現主人拎住個電話偷拍緊佢呀！死啦，呢個猙獰樣放咗上網，咁狗狗純情可愛嘅玉女形象咪冇咗囉？

作為有經驗嘅專業演員，呢個時候梗係要九秒九chok返個cutie純良樣出嚟啦！不過，狗狗你太遲喇！你嘅狠樣已經畀主人紀錄低喇～仲要畀人見到你秒速變臉嘅絕技，你都係準備開記招罷啦。

其實形象呢家嘢，係你哋啲汪星人先會咁介意㗎啫～你睇下來自喵星嘅主子，真係睬你都有味呀。只要主子喜歡，上一秒幾可愛幾萌都好，下一秒都可以變成屍殺主子，完全無視拎住電話嘅奴才感受，奴才事後仲要謝主龍爪呀陰功！

封面圖片及資料來源：uma___／twitter 、kokesukepapa／twitter