作為一個走在潮流尖端嘅廢青，衣櫃入面一定要有返條爛牛坐陣先得嘅！而呢位台灣網民嘅朋友仔都當然唔例外，擁有一條充滿時尚感嘅爛牛啦，著住佢隨性得嚟又帶點不羈，不羈得嚟又帶點性感，都不知幾L型呀！

你以為呢位朋友仔可以同爛牛快快樂樂咁生活落去？你唔好咁天真咁傻啦，呢個世界邊有咁美好吖……早前，呢位朋友仔因為工作嘅關係要離開屋企一個星期，就喺佢做完嘢返到屋企諗住摷條爛牛嚟著下嘅時候，佢就發現自己條爛牛發生咗史毛前例嘅巨變喇！

嗚哇！原來阿嫲趁佢唔喺度嗰陣幫佢縫起咗佢條爛牛上面啲窿呀！嗱你哋講句公道說話嘞，一條冇窿嘅爛牛仲算得咩爛牛先？對一條爛牛嚟講，冇窿就好似男人冇丁丁一樣咁可悲！唉，爛牛你今次真係死得好慘呀……

btw，講到可悲嘅又點止爛牛吖，之前有位妹豬畀老竇縫起件露膊衫咪又係咁……

any肥啦，其實樂觀啲睇，阿嫲都係驚呢位朋友仔冷親對美腿啫，何況阿嫲已經好細心咁用返牛仔布嚟幫你縫窿，你咪欣賞下阿嫲嘅縫窿手勢！再講吖，阿嫲已經好畀面你，冇幫你縫埋嗰兩執「鬚鬚」㗎喇喎！

資料來源：dcard、源源的小小君／微博

睇埋：【係父愛呀】老竇！你做咩縫起我件露膊衫呀！