新年前就特別多人上網買嘢嘅，想有新衫新褲過年呀嘛。一般包裹都會用速遞，貪佢既方便又快捷～但係如果你冇咁急要，就可以搵送信純熟嘅郵差叔叔幫手喇。寄包裹嘅方法好簡單，同寄信一樣，黐返相應郵費嘅郵票就得㗎喇～

不過有人就咁樣寄包裹⋯⋯嗱嗱嗱，雖則包裹係重啲啫，但係你都唔使黐到成個包裹都係郵票㗎？咁樣逐個數，數到天黑先知夠唔夠郵費喎，郵差叔叔真係多得你唔少呀！

同學，其實你知唔知郵票有分好多種面額，你係唔使用晒同一款最低面額嘅2円郵票貼到好似花紙咁包住個箱㗎啵，話就話隻兔兔都幾打耳啫。

其實大家怪錯咗呢位賣家喇！雖然佢用咗超過300個2円郵票（計據事主非正式統計）嚟寄嘢，但以毛毛9估，佢咁樣都係為咗做商品說明啫。因為佢寄嘅貨係2円郵票嘅放大版咕?呀！賣家一定係怕收貨人唔記得自己買咩，所以黐到成個包裹都係2円郵票啫，真係唔該晒你呀！吖，唔知事主收貨嗰陣有冇感受到郵差叔叔親切嘅問候同友善嘅目光呢？

封面圖片及資料來源：ssoyflour／twitter、日本郵趣協會