影呃like相真係好講靈感㗎，有時候明明上行架生化行妝，但係影極都係爭啲咁；有時行街經過又突然見到某個角落好有feel，點知撞正自己頹著兼素顏，真係塵世間最痛苦莫過於此呀！不過唔使騰，no problem，有台灣網友就好叻叻豬咁諗到個最新嘅呃like方法，就算你個樣好似畢加索咁抽象都可以隨時隨地影型仔相㗎！

咦？個頭呢？

是咁的，頭，一直都在。呢位朋友只係低頭望明月，諗住影張型仔沉思相啫，點知好隊友幫佢影到頭都冇埋。不過望望下又幾得意喎，咁咪將錯就錯影咗成set冇頭相出嚟囉。

其實冇頭又有咩好怕喎，都可以Selfie㗎啫～之但係頭都冇嘅時候佢究竟自拍緊啲咩呢下⋯⋯

好兄弟嘅嘢，冇頭又好，冇女又好，都係一樣咁撐你嘅！喺茫茫人海之中，兩個冇頭嘅7頭可以遇上，都算係一種緣份吖～

呢啲冇頭相雖然望落好似畀人P走咗個頭咁，但其實全部都係「純天然製造」，只要你有件企領衫或者帽T，個頭又耷得夠低，咁就影到㗎啦～出去旅行影厭咗Follow Me，想影下新意思，不妨試下呢set相呀～不過奉勸大家一句，新年流流，就唔好拜年嘅時候玩喇，無謂要畀人開年啦係咪？

封面圖片及資料來源：dcard