你哋班乘客次次搭車都趕頭趕命咁，下下都狗衝上車，咁樣好易出事㗎嘛！

最近，喺twitter就流傳咗一張日本電視節目嘅cap圖，疑似話日本一間地鐵公司為咗令班乘客唔會狗衝落月台上車，特登喺月台近樓梯嘅位置整咗幅地陷3D畫。

嘩！就咁喺樓梯頂望落去，月台塊地板就好似穿咗個大窿咁，第一眼望到嗰下真係嚇到個心離一離……想話唔慢慢行都唔得啦！吖～估唔到班日本仔竟然諗到用地陷3D畫嚟令班乘客慢慢行，佢哋又真係幾有創意㗎啵～

而講到有創意嘅又點止日本地鐵公司吖，一眾網民嘅創作用量同幻想都同樣嚇你一跳！有日本網民嫌呢幅地陷3D畫唔夠恐怖，於是就出動PS大神喪改圖。

咁又係嘅，第一次見到呢幅地陷3D畫就話嚇到個心離一離，畀幅3D畫大到啫，但當你每次行落呢個月台都見到呢幅3D畫嘅時候，你就唔會再驚㗎啦！嗱，而家有咁多網民幫手改圖，咁咪可以定期轉唔同花款，唔使驚班乘客睇到厭，幅3D畫又唔會冇晒阻嚇作用囉（好似係）。

資料來源：Geda_2／twitter、shgeryu／twitter、aotoluke／twitter、msyun819／twitter