各位家庭觀眾經過長時間嘅拜年訓練，應該對甩禮盒好有心得，一拎上手就知嗰盒係朱古力定曲奇餅㗎啦。其實計毛毛話，甩禮盒有幾難吖？甩利是先係最難吖嘛～封封利是嘅重量同厚度都差唔多，真係冇返咁上下功力都估唔到佢入面有幾多錢呀！

不過如果你收到嘅係一封有成6.5mm厚嘅利是，應該唔使甩都知入面疊水喇啩？

是咁的，話說最近有台灣網民去拜年嘅時候就收到一封厚厚嘅利是。經佢用尺度過，封利是仲足足有成6.5mm咁厚?！佢心諗今次一定爽歪歪啦，點知一拆開封利是先發現原來入面放咗幾塊紙皮，只有最面同最底嗰張先至係真銀紙……即係話佢呢封厚厚嘅利是其實得200蚊台幣（大約50蚊港幣）咋！

嗚哇！呢位親戚平時做開女神㗎？咁鍾意畀假希望人哋嘅？

btw，呢位網民又唔使咁灰9嘅，早前另一位台灣網民抽到公司十萬現金獎，點知打開先知係十萬蚊柬埔寨幣咪又係咁！唉，計返匯率都係等於兩嚿水港紙咋陰功……

其實樂觀啲咁睇，起碼封利是都唔係全部紙皮，都仲有200蚊台幣喺入面吖！係咪呀，哈姆太郎？

資料來源：楊慶堂／爆廢公社、鄭鉅耀／爆料公社

睇埋：【喊出嚟】抽中公司十萬現金獎 點知打開先發現係柬埔寨幣