古乳有暈，冇圖冇真相，去旅行梗係要同地標影相，咁放上FB啲人先知你真係去咗嗰度㗎嘛。如果個地標冇咗，或者因為某啲原因封咗，搞到連卡都冇得打，咁就真係世界未日喇！

好似京都呢個天狗像咁，去鞍馬山點可以唔影返張相留念呃like呀？而天狗像嘅神髓，就係嗰個又長又粗嘅⋯⋯鼻哥喇！呢個咁具象徵意義嘅鼻，真係睇到都有啲興奮呀！

不過再堅硬嘅鼻哥，都有承擔不能嘅重量。是咁的，京都早排落大雪，啲雪積咗喺個鼻度重得滯，搞到天狗哥個鼻斷L咗呀！Molamola，天狗冇咗條鼻仲點叫天狗喎，唔通要轉行賣獅子狗？你睇天狗哥個樣就知佢幾sad啦。

景點爛咗，咪是但求其掛個牌話「待修」囉，係就係冇乜人情味㗎喇，搵食啫，犯法呀？

不過日本官方就唔同喇，見天狗哥真的受傷了，嗱嗱臨幫佢黐返塊大膠布，仲加塊牌話畀旅客聽天狗而家治療當中。咦？咁樣嘅天狗哥望落又幾cutecute啵～同佢Selfie都幾好吖，今次關公真係造福咗一眾嚟鞍馬山影相呃like嘅善信呀！放心啦天狗哥，你好快就重振雄風㗎喇！

封面圖片及資料來源：Boredpanda