執屋最大嘅樂趣就係打開啲N年冇開過嘅嘢，嗰種刺激就好似買大細咁，你永遠唔知開出嚟係一堆美好回憶定係一竇已經開枝散葉嘅小強家族㗎。呢位網民諗住趁新年執下阿婆啲嘢啦，點知搵到阿婆那些年嘅潮爆大紅喼呀！唔知阿婆個喼裝咩㗎呢，會唔會有成箱錢呢？係就發達喇！

唉，好心你幾廿歲人就唔好咁多非實用性幻想啦！錢就冇喇，膏就有條，仲係好大支嘅黑人⋯⋯牙膏呀！咦喂，乜包裝上面個黑人公仔咁樣樣嘅？係咪藥房哥仔蝦阿婆，畀A貨佢呀？

其實呢支牙膏係70年代留到而家㗎喇～唔知仲唧唔唧得出呢？嘩，呢個黑人仲要咁嘅樣望住你笑，真係笑到你心到寒埋呀，唔怪得阿婆都唔敢用啦。

呢排咁興穿越，估唔到就連古古力嘅包裝都穿越埋一份呀，喺日本就有人喺圖書館借嗰本書度搵到被遺忘嘅包裝喇！拎朱古力紙盒做書籤都唔算少見嘅，但係呢個紙套個Design好復古咁啵～

對一對網上個包裝發展表，原來呢個古古力包裝係1931年至1940年出㗎～即係仲老過你同我呀！好似係。

所以話睇書幾重要～古乳有暈，書中自有黃金屋吖嘛，原來書入面唔止可以搵到古董嘢，仲真係有金執㗎！有人試過喺二手書度搵到兩萬円?～冇咩事，毛毛想出一出去圖書館先。

封面圖片及資料來源：高泰淇／爆廢公社二館、AKAIWA8095D／twitter、twitpic