聖誕節會去尖東睇燈飾，新年梗係都要去花燈晚會，欣賞下傳統工藝啦，唔得淨係掛住啲外國勢力㗎嘛～舊年台灣嘅南投燈會就有件作品引起大家瘋狂些牙喇，佢有咩咁巴閉？一齊睇過～

今年呢就雞年，數一數先……即係舊年係猴年啦！擺返盞馬騮花燈喺度都幾應節呀，隻馬騮個樣係就係似小丸子爺爺多啲，不過冇計啦，鬼叫佢猴年大晒咩。

咦唔係喎，睇清楚啲，乜下面個牌寫住「土撥鼠」嘅喂？乜台灣啲土撥鼠生得咁奀挑鬼命㗎？

唔好蝦毛毛細路哥唔識世界喎，明明土撥鼠係咁樣樣㗎嘛！呢隻馬騮，今次真係識佢土撥鼠喇……

算啦新年流流，都係唔好望返轉頭，向前看好過啦。回帶完上年嘅花燈，一於睇下今年又有咩作品吖。咦喂，乜又係你呀陳生？今年唔係猴年又唔係鼠年，無謂搶風頭啦你！唔好以為改過個名做「山肖」，我就唔認得你啵，算罷啦六師弟！仲有呀，嗰隻藍色面紅色鼻嘅動物，應該係「山魈」呀……

叫你扮土撥鼠又唔似，改個名做山肖又寫錯，不如你都係乖乖地認命，承認自己係《魔戒》入面隻咕嚕好過啦。

封面圖片、資料來源連結：黃盛澤