地獄廚神嘅威水屎，都同大家些牙過唔少啦，減肥嘅時候睇真係一流㗎，包你立馬咩胃口都冇晒！根據毛毛縱橫劣食界多年嘅觀察所得，通常都係整卡通公仔曲奇最易出事嘅，但你以為唔整甜品就可以安全呀？傻啦，畀你估到就唔係地獄廚神啦！

用麵包機整麵包，都係跟住食譜呢種粉落少少嗰種粉又落少少啫，最多咪甜得滯硬得滯咁，齋影相人哋都應該睇唔出你有冇fail嘅，夠晒穩陣呀！睇下家姐整呢件厚多士先，係就係有少少碎咗，不過整體嚟講都不失為一塊香口多士嘅～

用平底鑊烘完一面，記得反轉烘埋另一面呀，咁先夠黃金㗎嘛～咦，乜有個窿嘅喂？

家姐呀，乜件多士咬落咁脆口嘅，你烘咗幾耐呀？唔對路喎，好似唔係脆，係硬到咬唔到呀……哎呀咬到牙都甩埋喇！成支攪拌棒喺嚿麵面入邊呀，你點搞㗎！到底要去到地獄幾多層先可以做到呢個級數嘅暗黑料理？！

烘咗件多士咁耐都唔發覺，仲要賴係阿媽買咗隻新酵母先會fail……家姐，你係得嘅！不過下次煮飯都係唔使預細佬喇，容乜易入面收埋成個鑊鏟㗎？

封面圖片、資料來源連結：chyuuu／ptt

睇埋：【暗黑料理】阿媽你整到我啲曲奇成條sss咁真係好咩…