古乳有暈，搵食艱難，打工仔最慘莫過於冚世界放假你要返工，仲要新年流流個個都全家出動消費，真係忙到甩碌呀！所以大家過咗個Happy Holiday真係要好好多謝呢班冇假放嘅偉人呀！不過原來唔止做人搵食咁難，做吉祥物都唔容易呀！

新年點可以冇財神爺坐鎮呀～大大個財神由年廿九擺過年，今年仲唔發大財！但係你哋啲人掛住發達，有諗過財神爺感受咩？沒有！因為你只想到你自己！可憐財神企足成個新年，OT又冇補水，咁搞法神仙都死呀。唉⋯⋯笑足咁多日，攰到漏晒氣喇，唯有趁冇咩人偷雞瞓一陣啦～真係睇到都戥佢辛苦呀！

你估做其他吉祥物又好爽歪歪呀？唔好彩連命仔都冇㗎～好似貍貓Ponta仔，諗住喺便利店出面教下大家儲印花啫。唔知邊個咁衰同新瀉縣嘅吉祥物えちゴン 講有巨大浣熊出沒，えちゴン仲要帶埋支獵槍嚟，搞到Ponta仔幾乎個身開窿呀！

有啲吉祥物就連佢本身嘅存在就已經係一個笑話⋯⋯即係咁，話就話你個地方叫吳市啫，都唔係一嚿方形毛毛加個吳字就算㗎！以毛毛9估，你分明就係海綿寶寶！咪以為著住件藍色毛毛衫寫多兩隻字出嚟秘撈就唔認得你喎！

封面圖片及資料來源：echi_gon／twitter、hiroshimafm／twitter