（重要提示：冇女可以返回上一頁，因為呢個post唔關你事。）

女人真係一種好神奇嘅生物。平時去行山行多兩步都話攰，但講到行街濕平呢，就即刻老虎都打死幾隻咁，唔行晒咁多間舖頭都唔肯走！女人嘅濕平戰鬥力咁強勁，一眾男士真係拍馬都追唔上呀……唉，所以咪搞到班男人次次陪女女行街都等到變化石囉！

不過咁，假如你女人行嘅係呢間舖頭嘅話，你應該就唔會想走，仲想你女人有咁耐行咁耐?～

是咁的，話說最近有台灣網民就去咗日本廣島旅行，濕平期間就咁啱畀佢見到一間賣女人衫嘅舖頭入面竟然設有非常豪華嘅「男友待領區」。個「男友待領區」裡面有櫈坐、有機打，而且仲要係男士們嘅天堂－超級任天堂呀！！！

嗚哇，有櫈坐唔使9企已經好幸福㗎啦，而家仲要有埋超任打？女朋友，你想行幾多個鐘就行幾多個鐘啦，行幾耐我都可以呀！

嗱老老竇竇，假如真係將呢個設有超級任天堂嘅男友待領區引入香港嘅話，就唔該唔好淨係整喺女裝部，順便整埋喺女廁門口喇喂！嗯，你哋都知班女人去一次廁所要幾耐時間㗎啦……Zzz……

資料來源：爆廢公社、dcard

睇埋：【男友待領區】到底啲女人行街要行幾耐先夠？