你哋班愚蠢嘅人類，唔好見到狗狗成日對住你哋傻笑就以為佢哋好蠢先得㗎，其實汪星人不知幾醒！無論佢哋有幾曳曳豬，只要是旦喺你哋面前賣個萌，你哋咪又會乖乖地幫佢哋執手尾！唔止呀，只要狗狗擺多個可憐樣，你哋仲會即刻心軟到唔捨得鬧佢哋?～

咦！乜狗狗唔係只要賣萌就玩晒㗎喇咩？做咩呢隻狗狗畀主人入袋咁慘嘅？唔通係佢做錯嘢唔記得用賣萌三式嚟求情？唉主人你又係嘅，就算狗狗做錯嘢都唔使咁罰佢呀……喂咪住先，你唔係想賣咗佢呀嘛？！

其實大家怪錯主人喇！呢隻狗狗之所以被入袋，係因為佢散步嗰陣貪玩跳落水，就算主人九秒九用強勁嘅臂彎救佢上水，佢上咗水之後都凍到騰騰震，所以主人咪唯有用膠袋幫佢保暖，再即刻帶佢返歸，費事佢吹親囉。

不過咁，主人你有冇諗過其實你隻狗狗都唔輕呀！隻狗狗咁肥美，萬一陣間個膠袋hold唔住，咁狗狗咪……咪咪咪，咪咩呀咪，嗱嗱聲護駕啦嘈！

封面圖片及資料來源：頭條號