住喺個石屎森林入面，成日見嚟見去都係嗰啲高樓大廈，同間間都差唔多嘅鋪頭，條街又咁L多人，行街仲有咩意思喎！但如果話你聽，喺你行緊嘅每一條街同每一間鋪頭都可能收埋好多好打耳嘅裝飾，仲好啱影相呃like，係咪即刻覺得有心機好多呢～

喺美國一個叫安娜堡嘅城市，就有一個隱藏設定，無論係喺室外定室內，只要你細心觀察，就會搵到啲設計精美嘅門仔㗎喇～但係啲門咁細，畀邊個用呀，睇嚟要問叮噹借支縮細電筒先用到啵～

有個自稱係「仙子學家」嘅朋友就話，佢喺1993年搵到第一道門，而門後面有條樓梯通向另一道門，但係第二道門就鎖咗嘅，所以始終都搵唔到門後嘅秘密⋯⋯以佢嘅9估，呢啲一定係仙子住嘅地方！一定係，除非唔係！

自此之後，喺呢個城市就越嚟越多呢啲門仔啦，唔止喺街頭轉角同大廈外牆有，就連大會堂同畫廊裡面都有?！唔通真係有借矮人的小東西喺呢度住，仲開枝散葉，所以周圍都見到佢哋啲屋？

有人話所有嘢都係嗰個仙子學家搞出嚟㗎啫，嗱嗱嗱，有些事情就不要拆穿啦～反正而家個城市咁有特色，居民同遊客都可以唔使成日對住部電話，多啲留意下身邊嘅嘢，啲大人仲可留返少少FF嘅空間畀下一代?，咁都未嘗唔係一件好事吖～你話係唔係呀，哈姆太郎？

封面圖片及資料來源：Boredpanda