啲人成日話夾公仔好易，你以為係你叻咩？唔係啲公仔想跟你走，你會咁易夾到咩？佢哋仲喺部機度等咗你哋帶佢返屋企好耐?呀，你睇三眼仔就知啦～有啲公仔其實仲係邪惡嘅化身，等你好開心咁帶佢返屋企，之後先露出令你崩潰嘅真面目㗎！

你睇下呢隻戴熊大帽嘅Cony幾卡哇依，個網民仲要好威威咁話用10蚊台幣就夾到佢返嚟喇。得喇得喇，知你叻喇，雖然喺街邊夾嘅公仔都唔預佢係正版嚟㗎喇，但係睇落呢隻個手工又唔錯啵衰鬼～

幫Cony除咗頂帽仔，影下側面都幾對版，睇嚟今次真係有賺喎！至少唔會係變種比卡超咁嘅款吖～不過，少年人，你開心得太早喇⋯⋯

嗚⋯⋯點解正面睇隻Cony有3隻耳仔㗎！老闆，你賣番梘貨都唔好咁離譜先得㗎，家陣畀二郎神做寵物呀？3隻耳配返3隻眼咁話啦啵？有網友就話，基因突變啫～好出奇呀？冇睇過Xmen咩？遲啲變千耳兔?呀！

網友仲P埋圖畀個效果你睇?～係咪好有親切感呢？唔通千耳Cony Cos緊向日葵又要話你知咩？但係咁嘅樣嘅Cony，唔好話毛毛，睇怕連熊大都接受唔到囉。為咗預防家庭暴力，千耳Cony你都係返火星啦，地球係好危險㗎。

封面圖片及資料來源：dcard