花師奶教落，食完lun廚冇耐又覺得口痕想食嘢，千祈千祈千祈要堅定自己意志，唔好咁輕易去入茶記食tea呀，唔係點儲到私己錢呀！口痕咋嘛，去超市行個圈，食勻晒咁多款試食咪得囉，加加埋埋都夠頂癮㗎喇。試食就話剪到細細粒咁畀你吖，估唔到而家連面膜都興出迷你版喎。

面膜試用裝？係咪即係送住一塊畀你用下先呀？傻啦，呢款堅・試用裝係得細細塊㗎咋！咩呀，免費有mask你敷仲咁多嘢講，你估特登研發咁細個模唔使時間呀？

有得你用就用啦，人哋話手係女仔第二塊面，最多咪敷喺手仔度先囉。不過同面膜對空洞無神嘅雙眼四目交投得耐，硬係凝住敷完會有隻寄生獸喺手背生出嚟囉……

少年，你估試用裝真係畀你試下有冇效呀？講真吖用得嗰一塊你想靚得幾多啫，人哋係畀你試下有冇敏感㗎。細細塊咪好囉，真係一個唔好彩引起敏感，最多都係變小丸子或者麵包超人啫，唔會好似關公咁成塊面都紅晒吖嘛。

封面圖片、資料來源連結： dcard

同場加映：【玩嘢呀】奴才你買個咁細嘅貓抓塔畀朕係咩意思？